«ՏՈՒՆԿ» ԳԻՆԻՆԵՐ

Սույն տարվա հունիս ամսին, համաճարակի ցավալի փորձություններին զուգընթաց, ծնվեց գինու նոր, առավել խոստումնալից «Տունկ» ապրանքանիշը։ Անշուշտ, այս օրերին, ինչպես մնացյալ ասպարեզներում, այդպես և հայկական գինեգործության մեջ նորեկի լույս աշխարհ գալը պիտի լիներ սպասված և ուրախալի մի ավետիս։ «Տունկ» գինիները հեղինակել են արդեն մեծ ճանաչման արժանացած ու եվրոպական շուկային վայել պրոֆեսիոնալիզմ ձեռք բերած գինեգործները, որոնցից առանձնակի հիշատակման է արժանի Վահե Քեուշգուերյանը։ Վարպետության, հոգատար մոտեցման և թարմ հայացքների շնորհիվ «Տունկ» գինիներն արդեն իսկ արժանացել են բազում դրական արձագանքների։ «Տունկ» սպիտակ և կարմիր գինիները պատրաստաված են դասական Վայոցձորյա խաղողի տեսակներից՝ համապատասխանաբար՝ Ոսկեհատ և Արենի։ Օգտագործվել է բացառապես ուշահաս խաղողի այգիների բերքը, ինչի շնորհիվ գինիները ձեռք են բերել յուրօրինակ հարուստ, մրգային և, միաժամանակ, նուրբ համային ու բուրային փունջ։ «Տունկ» սպիտակ գինին առանձնանում է հարուստ տրոպիկական մրգերի հյութեղ բույրով, և թուրինջին ու այլ ցիտրուսային մրգերին բնորոշ համային փնջով, մինչդեռ կարմիր Արենին նուրբ է, պսակված վառ հատապտղային երանգներով ու պղպեղի բույրով։